Xuño 2013

Xuño é o sexto mes do ano e o que marca o final do curso e o comezo das vacacións. É un mes de moito traballo na escola, pero tamén no campo, xa que hai que coidar as plantas que comezan a medrar. Sulfátanse as vides, cávase e raréase o millo, apáñanse as patacas temperáns, cóllense os primeiros tomates, pementos de Padrón e xudías; recóllense os últimos chícharos, apáñase o centeo e o trebo; recóllense as cereixas, as primeiras mazáns, claudias, ameixas e pexegos.

É tempo de moitas flores e insectos. Florecen os castiñeiros, as silveiras, as vides, os cabrinfollos, as roseiras silvestres, as fresas silvestres, os breixos... Nas pozas saen das crisálidas os cabalos do demo e os cínifes, e vense os cabezolos de rans, sapos e lagartiños de auga. Saen os escarabellos de San Xoan e moitos tipos de bolboretas. Nacen os polos do paspallás, as bubelas, as rulas... voan os das pegas, os merlos, ... Rápanse os carneiro, é a mellor época para a sardiña e o xurelo, e comeza a costeira do bonito e o atún.

Comeza o verán. O día 21 de xuño é o máis longo do ano (solsticio de verán).

Este ano o bo tempo fíxose esperar e comezou case a final de mes con temperaturas moi altas. E tamén tivemos o primeiro incendio no monte Xiabre (caldas de Reis), os días 29 e 30, que encheu de fume toda a comarca.