O mundo da Astronomía
Comeza de novo o Plan de Excelencia no Asorey
11 Xaneiro 2013
Esta primeira edición, da Buxaina, do ano 2013 coincide co inicio da segunda edición do programa de Excelencia adicada novamente ao mundo da “Astronomía”.
A astronomía é un campo interdisciplinar no que teñen cabida coñecementos de moi diferente índole pero que sen dúbida na actualidade está a supor grandes avances de natureza científica e tecnolóxica para a nosa sociedade.
A nova edición deste proxecto pretende que un grupo de alumnos e alumnas de 3º e 4º de ESO, co apoio de profesorado de moi diversas especialidades (Bioloxía, Física, Matemáticas, Inglés, Tecnoloxía, Música, Informática, Xeografía e a colaboración do Taller Lumiere) tentarán achegarse, de novo, ao mundo da astronomía desde moi diferentes puntos de vista.
Pretendemos que esta revista dixital, dos Departamentos de ciencias, permita achegar este proxecto a todos/as aqueles/as que sintan interese polo “Mundo da Astronomía” , e que sexa utilizada esta ventá da Buxaina para dar a coñecer os seus traballos e transmitirnos novos coñecementos e inquedanzas sobre o Universo do cal formamos parte.
Convidamos a todos aqueles/as autores/as e futuros autores/as desta revista dixital do IES Francisco Asorey, a achegarse ao apaixoante mundo da Astronomía; un campo do saber que, por outra parte, xa o alumnado do noso centro tivo a oportunidade de achegarse en anteriores ocasións como foron na xornada da “Ciencia na rúa” ou na “Semana da Ciencia” adicada , no seu momento, á astronomía.
