Mollámonos polos ríos
7 Outubro 2014
520 persoas molláronse polos ríos en toda Galiza e retiraron máis de 11 toneladas de residuos na VII Limpeza Simultánea de Ríos.
A VII Limpeza Simultánea “Móllate polos ríos” celebrouse este ano en 43 concellos de toda Galiza, e participaron máis de 50 entidades (asociacións, comunidades de montes, colectivos ecoloxistas, centros de ensino, concellos…). Algúns destes grupos xa participaron nas limpezas de anos pasados e outros son grupos participantes no Proxecto Ríos. Na nosa zona o CES encargouse de coordinar a limpeza nun tramo do río Umia.
O Proxecto Ríos é un programa de Educación e Voluntariado Ambiental que ten a finalidade de dar a coñecer o importante papel dos cursos fluviais, amosar as súas problemáticas e fomentar iniciativas que permitan á cidadanía o mantemento e a mellora dos ríos, proporcionando as ferramentas que garantan a súa participación. O noso centro participa neste proxecto encargándose do estudo dun tramo do rego da Armenteira.
Queremos uns ríos limpos, queremos poder gozar dos nosos sistemas fluviais e queremos concienciar á sociedade da necesidade de que estes estean ben conservados.
