Febreiro (2016)

Febreiro é o segundo mes do ano no calendario gregoriano, con 28 días os anos normais e 29 os anos bisestos. Foi chamado así en honra ás festas “februas”, o festival da purificación na antiga Roma, que naqueles tempos coincidían co fin de ano.

Na natureza aparecen os primeiros sinais do final do inverno. Comezan a inchar as xemas das árbores. Florecen os salgueiros, as mimosas, as acacias, os amendoeiros, os pexegueiros, as magnolias, o romeu, os loureiros, os narcisos, os xacintos, os toxos, os cáncaros, as violetas, a herba de namorar...

Os gatos, os lobos e os esquíos entran en celo. No mar desovan os abadexos e as raias; nos ríos as troitas. Aparecen os primeiros niños: pardais, merlos xiríns... Escóitanse os mouchos. Comezan a marchar as aves invernantes. Saen as primeiras ras.

Lábranse e fertilízanse as terras, fanse as parras, pódanse e átanse as viñas e nacen as patacas do cedo.

O tempo foi moi cambiante con fortes temporais de vento e neve e moitos días de chuvia. O día de máis calor foi o 21, con 17,59 ºC e o de máis frío o 19, con 1,59 ºC. O refacho máximo de vento foi de 90,22 km/h o día 6. Choveu 18 días e recolléronse 223,6 l en total. O día que máis choveu foi o 12, con 45 l.

DATOS GALICIA

-Refacho de vento máis forte: A Coruña, 156 km/h (día 6)

-Temperatura máis baixa: -9,2 ºC en Lardeira, Carballeda de Valdeorras (día 16)

-Temperatura máis alta: 21,8 ºC en Pontevedra (día 20)

-Maior cantidade de precipitacións recollidas: Fornelos de Montes, 602 l. O día que máis chuvia se recolleu foi o 12, en Rebordelo (Cotobade), con 143 l.

-Os días aumentaron en 74 minutos.