Chupasangues

Os animais hematófagos son os que se alimentan do sangue doutros animais.

Para acceder ao alimento teñen aparellos bucais especialmente adaptados para perforar, morder ou raspar a pel das presas e sistemas para extraer o sangue: linguas para lamber, trompas ou tubos para succionar... Para facilitar a saída do sangue inxectan unha saliva con substancias anticoagulantes ou anestésicas, que son as responsables de producir o desagradable picor e ás veces reaccións alérxicas moi molestas. Detectan ás súas posibles víctimas polo olor, a temperatura ou a cor.

Unha gran parte das especie hematófagas son insectos (piollos, chinches, moscas, mosquitos) ou arácnidos (carrachos). Tamén hai vermes (samesuga), peixes (lamprea) e mamíferos (vampiros).

Algúns desde animais poden transmitir coa súa picadura graves enfermidades como a malaria (mosquito Anopheles), leishmaniase (mosquito Phlebotomidae), a enfermidade do sono (mosca tse-tse), a enfermidades de Chagas (chinches Reduviidae), a enfermidade de Lyme (carrachos)...