Xuño 2014

Xuño é o sexto mes do ano e ten trinta días. Entra o verán, rematan as clases e os exames e, para algúns, comezan as vacacións.

Florecen os castiñeiros, as silveiras, as vides, os cabrinfollos, as roseiras silvestres, as fresas silvestres, os breixos... Sulfátanse as vides, cávase e raréase o millo, apáñanse as patacas temperáns, cóllense os primeiros tomates, pementos de Padrón e xudías; recóllense os últimos chícharos, apáñase o centeo e o trebo; recóllense as cereixas, as primeiras mazáns, claudias, ameixas e pexegos. Nas pozas saen das crisálidas os cabalos do demo e os cínifes, e vense os cabezolos de rans, sapos e lagartiños de auga.

Saen os escarabellos de San Xoan e moitos tipos de bolboretas. Nacen os polos do paspallás, as bubelas, as rulas... voan os das pegas, os merlos, ... Rápanse os carneiros.

É a mellor época para a sardiña e comeza a costeira do bonito e o atún

O día 21 de xuño é o máis longo do ano (solsticio de verán), remata a primavera e comeza o verán.

O tempo foi un pouco revolto, con grandes variacións de temperatura e algunhas chuvias.