Parque Natural Baixa Limia-Serra do Xurés

O Xurés é un amplo espazo no sur de Ourense, na raia de Portugal, que forma parte dun gran parque transfronteirizo (Xurés-Geres) no que podemos atopar paisaxes impresionantes, formas de grande interese xeolóxico (penedías, vales glaciares, fervenzas, surxencias termais…) unha gran biodiversidade, con especies pouco comúns, e variedade de mostras etnográficas e restos arqueolóxicos romanos e prerromanos.

O Parque Natural da Baixa Limia-Serra do Xurés abrangue terreos dos concellos de Entrimo, Lobios, e Muíños. O LIC inclúe, ademais dos terreos do parque natural, a Serra da Pena e a Serra do Leboreiro nos concellos de Bande, Calvos de Randín, Lobeira, Padrenda, Quintela de Leirado e Verea.

A maior parte da superficie é terreo de montaña no que se practica o pastoreo e arredor dos asentamentos humanos as terras están adicadas á agricultura.

O río principal é o Limia, retido nos encoros das Cunchas e Lindoso, que recibe numerosos afluentes que baixan das serras que o rodean (o máis importante é o Salas).

As características climáticas da zona, de transición entre a zona atlántica e a mediterránea, xunto coas diferencias de altitude entre os cumios e os vales da lugar a unha ampla variedade de ecosistemas de gran riqueza biolóxica.

Dada a amplitude do espazo é imposible coñecelo nun día e, ao ser terreo de montaña, e protexido nunha gran parte, hai que percorrelo a pé.