Novo molusco na Ría de Arousa

A Ría de Arousa  convertíuse nos últimos tempos no escenario de especies ata o momento descoñecidas e que están a ser obxecto de estudo por distintos grupos de investigadores.

Un dos últimos achádegos é un gasterópodo duns 6,5 milímetros de lonxitude atopado por membros do Grupo de Estudo do Medio Mariño de Ribeira. O novo molusco foi denominado «Simnia jacintoi« bautizado como tal en honor á primeira persoa que observou esta especie e o actual presidente do GEMM.

Este é un  animal ata agora descoñecido para a ciencia e que foi atopado sobre colonias de corais brandos, coñecidos popularmente como «man de morto», a uns 25 metros de profundidade. Os estudos leváronse a cabo en colaboración co «Zoological State Collection Munich» de Alemaña, que atoparon exemplares desta mesma especie nas costas de Marrocos.

Con esta xa son seis as especies da familia Ovulidae que poden verse en Galicia, catro delas descubertas por membros do GEMM. Ata o 2010 tan só se coñecía a existencia de dúas especies desta familia nas nosas augas, pero nese mesmo ano localizáronse en diferentes puntos da Ría de Arousa varios exemplares de tres especies máis.
A importancia deste achádego está en que dúas delas, orixinarias do Mediterráneo, foron atopadas por primeira vez no Océano Atlántico, obténdose ademais fotografías dos exemplares vivos, feito inédito ata ese momento.